انٹرٹینمنٹ

ایشا دیول نے اجے دیوگن کو ڈیٹ کرنے کی خبروں پر بلآخر خاموشی توڑدی

20 مارچ ، 2025

بالی وڈ کی لیجنڈ جوڑی دھرمیندر اور ہیما مالنی کی بیٹی اداکارہ ایشا دیول نے اجے دیوگن کو ڈیٹ کرنے کی خبروں پر بلآخر خاموشی توڑ دی۔

2002 میں اپنے فلمی کیرئیر کا آغاز کرنے والی ایشا دیول 14 برس کے وقفے کے بعد اب اداکاری کی دنیا میں واپسی کررہی ہیں۔

حال ہی میں بھارتی میڈیا کو دیے گئے انٹرویو کے دوران ایشا نے ماضی میں اپنا نام کئی اداکاروں کے ساتھ جوڑے جانے پر بات کی، انہوں نے خاص طور پر اجے دیوگن کے ساتھ تعلقات کی افواہوں پر لب کشائی کی اور ساتھ ہی ان افواہوں کی وجہ بھی بتائی۔

یہ بھی پڑھیں

کیرئیر کے آغاز پر ہی متعدد اداکاروں کو ڈیٹ کرنے کی خبروں پر ایشا نے کہا 'ان میں سے کچھ خبریں ٹھیک تھیں جب کہ کچھ محض افواہیں تھیں، لوگوں نے میرا نام اجے دیوگن کے ساتھ جوڑا اور کہا کہ ہم ایک دوسرے کو ڈیٹ کررہے ہیں'۔

ایشا دیول کا کہنا تھا 'میری اجے کے ساتھ بہت خوبصورت وابستگی ہے جسے دوستی کا نام دیا جاسکتا ہے، اس رشتے میں پیار، عزت اور ایک دوسرے کے لیے ستائش ہے، ہم دونوں کا نام ایک دوسرے سے جوڑا جانا عجیب تھا'۔

اداکارہ نے ماضی میں اپنا نام کئی اداکاروں کے ساتھ جوڑے جانے پر کہا 'شاید یہ اس وجہ سے تھا کیونکہ میں اپنے ساتھی اداکاروں کے ساتھ کئی کئی فلموں میں کام کررہی تھی، اسی لیے میں ان کے ساتھ اکثر و بیشتر نظر آتی تھی'۔

واضح رہے کہ اجے اور ایشا نے ایک ساتھ کئی فلموں میں کام کیا جیسے کہ 'یووا' ، 'میں ایسا ہی ہوں'، 'کال' ، 'انسان' اور 'کیش' وغیرہ۔