11 جون ، 2025 
مسک جانتے ہیں مجھے ان سے پیار ہے، ٹرمپ کا ایلون مسک کے بیان پر ردعمل
11 جون ، 2025
امریکی صدر ٹرمپ سے متعلق بیانات پر ایلون مسک کے اظہار افسوس پر ٹرمپ کا ردعمل سامنے آگیا۔
اس سے قبل ٹیسلا اور اسپیس ایکس جیسی کمپنیوں کے مالک ایلون مسک نے کہا تھا کہ ان کی جانب سے امریکی صدر ڈونلڈ ٹرمپ کے بارے میں گزشتہ ہفتے کی جانے والی کچھ سوشل میڈیا پوسٹس پر انہیں پچھتاوا ہے۔
اب امریکی صدر کی جانب سے مسک کے بیان پر ردعمل دیتے ہوئے کہا گیا ہے کہ ’میرا خیال ہے کہ یہ بہت اچھا ہے کہ ایلون مسک نے ایسا کیا‘۔
امریکی صدر ٹرمپ نے کہا ہے کہ وہ ایلون مسک کی سوشل میڈیا پر تازہ پوسٹوں کے بعد مسک کے ساتھ مصالحت کے لیے تیار ہیں، صدر ٹرمپ نے سوشل میڈیا پر اپنی پوسٹ میں لکھا کہ ایلون جانتے ہیں کہ انہیں ایلون مسک سے پیار ہے، نائب صدر جے ڈی وینس کو بھی اس بات کا علم ہے۔
ٹرمپ کا کہنا تھا کہ وہ دنیا میں سب سے بہترین اور بڑی مصالحت کرتے ہیں اور اس کا سب کو علم ہے۔
خیال رہے کہ ٹرمپ اور مسک درمیان جاری تنازع کے باعث امریکی صدر ڈونلڈ ٹرمپ اور ایلون مسک کے درمیان شراکت داری ختم ہوگئی جس کے دوران ٹیسلا کے مالک نے ڈپارٹمنٹ آف گورنمنٹ ایفیشنسی کی سربراہی بھی کی۔
امریکی صدر سے تنازع کے بعد ایلون مسک کی کمپنی ٹیسلا کو مالی طور پر شدید دھچکا لگا تھا، مگر اب کمپنی کے حصص ایک بار پھر مستحکم ہورہے ہیں۔
دونوں کے درمیان یہ تنازع 3 جون کو اس وقت شروع ہوا جب ایلون مسک نے ٹرمپ کے مجوزہ بگ بیوٹی فل بل کو تنقید کا نشانہ بنایا۔
ایک انٹرویو کے دوران ایلون مسک نے کہا کہ یہ بل ان کے ڈپارٹمنٹ آف گورنمنٹ ایفیشنسی کے کام کو نقصان پہنچائے گا۔
بعد ازاں انہوں نے سوشل میڈیا پوسٹس میں کہا کہ اس بل سے امریکی بجٹ کے خسارے میں نمایاں حد تک اضافہ ہوگا۔
