کراچی کے علاقے گلشن اقبال بلاک 5میں اے ٹی ایم سے رقم نکلوانے والے شخص کو ملزمان نے لوٹ مار کے دوران قتل کردیا۔ کورنگی، لانڈھی، مومن آباد، جوہرآباد اور ناظم آباد سے 14 افراد گرفتارکر لیے گئے۔

گلشن اقبال میں ای ٹی ایم سے رقم نکلوانے والا 35 سالہ عمیر شاہ ملزمان سے لوٹ مار کے دوران مزاحمت میں فائرنگ سے زخمی ہوگیا جو اسپتال پہنچنے سے پہلے زخموں کی تاب نہ لاتے ہوئے چل بسا۔

جوہرآباد میں پولیس نے کارروائی کرکے اسٹریٹ کرائم میں ملوث 2 ملزمان سلیمان اور طیب کو اسلحہ اور موبائل فون سمیت گرفتار کرلیا۔ لانڈھی میں پولیس نے کارروائی کرکے 2 ڈکیت توفیق خان اور نصیر احمد کو اسلحہ سمیت گرفتار کرکے مقدمہ درج کرلیا ہے۔

دوسری جانب ناظم آباد میں پولیس نے خفیہ اطلاع پر کارروائی کرکے غیر قانونی رہائش پذیر 3 غیر ملکی باشندے عبد العزیز، فیروز اورشکور کو گرفتار کرکے فارن ایکٹ کی خلاف ورزی پر مقدمہ درج کرلیا۔

مومن آباد میں پولیس نے مفرور سمیت3 ملزمان فضل محمود، جمال الدین اور مفرور جنت گل کو گرفتار کرکے اسلحہ و منشیات برآمد کرلیں۔

ادھر کورنگی نمبرتین کے قریب پولیس نے لوٹ مار میں مصروف ملزم شیر محمد کو گرفتار کرکے موٹر سائیکل اور اسلحہ برآمد کرلیا ۔

شیر شاہ میں پولیس نے کارروائی کرکے 3ملزمان سلطان،محمدرضوان اور تنویر کو گرفتار کرلیا۔گرفتار ملزم سلطان مفرور تھاجبکہ رضوان اور تنویر کو کرایہ داری ایکٹ کی خلاف ورزی پر گرفتارکیاگیا ہے۔