06 اگست ، 2023 
سینٹرل ایشین والی بال چیمپئن شپ، سلور میڈلسٹ پاکستان انڈر 16 اسکواڈ کیلئے کیش انعامات
06 اگست ، 2023
تاشقند میں ہونے والی سینٹرل ایشین والی بال چیمپئن شپ کی سلور میڈلسٹ پاکستان انڈر 16 ٹیم کو کیش انعام سے نوازا گیا۔
سلور میڈلسٹ پاکستان انڈر 16 والی بال ٹیم کے اعزاز میں تقریب کا انعقاد لاہور جیم خانہ کلب میں کیا گیا، تقریب میں والی بال ٹیم اور پاکستان والی بال فیڈریشن کے عہدیداران سمیت سابق والی بال کھلاڑیوں اور کاروباری شخصیات بھی موجود تھیں۔
تقریب میں سینٹرل ایشین والی بال چیمپئن شپ کی سلور میڈلسٹ ٹیم کے کھلاڑیوں اور آفیشلز میں ایک ایک لاکھ روپے انعام تقسیم کیے گئے۔
اس موقع پر چیئرمین والی بال فیڈریشن چوہدری یعقوب نے کہا کہ نوجوان کھلاڑیوں نے شاندار کھیل کا مظاہرہ کیا، معمولی فرق سے ورلڈ چیمپئن شپ کے لیے کوالیفائی نہ کر سکے۔
انہوں نے کہا کہ کوالیفائی نہ کرنے کا دکھ ہے لیکن کھلاڑیوں نے شاندار کارکردگی سے دل جیت لیے، یقین ہے کہ مستتقبل میں بھی یہ بچے بہترین پرفارمنس سے ملک کا نام روشن کریں گے۔
